Untitled 1

Malamang sadyang ako ang may problema

Na gustong angkinin ang nakalaan sa iba

O baka naman nais mo rin

Pero nagpipigil lang ng damdamin

Dahil pag ang lihim ay nasiwalat

Ikasisira ng lahat

Pero baka nga sa akin lang ang problema

Dahil hindi ko makita sa iyong mga mata

O baka ako'y nalilito lang

Sa ipinapakitang kabaitan

Baka naman kasi wala lang ito

Lahat guni-guni ko

Aaminin kong masidhi ang nararamdaman

May ilang beses ding iniyakan

Dahil ba sa pagmamahal o kalituhan

Hindi ko maintindihan

Kung meron mang tiyak dito

Ay hanggang sa hukay dadalhin ang damdaming ito

Wala (?)

Kahit anong pilit, wala.

Para lang nanaginip,
Nakalimutan pagkaumaga.
Mukhang naglaro lang ang isip,
Kinailangan lang pala ng idlip
Upang sa katotohana'y magising
Sa guni-guning nilipad ng hangin —
Malaya. Masaya.

O baka lamang isang akala.

Tapat

Tapat
Ang una nating pagkikita

Sa apat
Na kanto ng mesa
Ang unang pagkilala

Agwat
Ng edad at estado

Sapat
Na mapagtanto
Sa unang pagkikita

Ang lugar nati'y mananatiling sa
Tapat

Daluyong

Kakaiba ang pagtagpo sa atin ng tadhana;
Ikaw ang alon, ako ang buhangin.
Ang pagkikita'y laging panandalian.
Hahampas sa isa't isa, masakit na nakaliligalig
At babawiin, hihilahin pabalik ng hangin.
Sa pagkulimlim ay tatahan,
Magngangalit muli kinaumagahan.